لقاء حصري وخاص مع الشاعر القدير / مخلد بن باني المحلفي السهلي

السلام عليكم ورحمة الله وبركاته


ضمن سلسلة لقاءات مجلس الشعر بمجالس قبيلة السهول الموقع الرسمي لقبيلة السهول ... ضيفنا اليوم هو الشاعر مخلد بن باني السهلي شاعر جزل وله مواقف وقصائد فالقبيلة وغيرها من الأغراض الشعرية

تعرفنا عليه من قرب وكان ابو باني صاحب اخلاق عالية ومكارم اخلاق استضافنا في منزله برويضة السهول ووجدنا كل حفاوة وترحيب وكرم لا يستغرب من اهلها .

-انت الآن ضيف علينا وفالبداية نرحب بك على صفحات المجالس .. ودنا تعرفنا اكثر على مخلد بن باني ..؟

الله يسلمك ويبارك فيك ويسعدني اكون ضيف عليكم

مخلد بن باني بن مساعد المحلفي السهلي

العمر 55 سنة


-متى بديت الشعر يابو باني . واول ابيات كتبتها اذا كانك تذكرها؟

بديت الشعر في عام 96هجري .. واول الأبيات اذكر منها هالبويتات

اقول

الله من همٍ برى الحال ياسعود = همٍ لجى فالقلب واعلن دماره
من لا يصد النفس عن كل منقود = ماظن في دنياه يكسب تحاره
لا كاسبٍ دنيا ولا جايبن زود = يالله دخيلك من حياة الخساره

1-تأثرت بمن من الشعراء ؟

كثيرين اللي اسمع لهم واحب قصائدهم مثل سويلم العلي رحمه الله وخزيم بن محسن الغزواني وغنيم الخبيش

2-الشعر اكتسبه مخلد بن باني من موهبه ولآ وراثه ؟

اكتسبته من وراثة فوالدي باني بن مساعد رحمه الله واموات المسلمين شاعر وله قصايد منها قصيدة في اخوه فريج بن مساعد يقول

البارحة ماذاقة النوم عيني = كني قريصن ساقة السم واجزاه
اقنب كما تقنب ذياب القطيني = وون ونت شاكي من كواياه
على عضيدن ناقلن هم ديني = اخوي لا بان الخمل في يرفاه
اللي على الهمات ضلعه متيني = ياكسر عزي عقب فرقاه كسراه
ماشان وجهه يوم غبر السنيني = ماحش حطه للنشاما تعشاه
ياعيد اهل هجنن لقربهم دنيني = لاجن من المضما شننهم مطواه
حطوه في قبرن وحيشن كنيني = يالله عسى الجنه مصيره اوماواه
وغديت انا عند العرب مستهيني = حتى المسيير دوننا يقصر خطاه

وهي اطول من ذلك


3-شعراء المحلف قديمآ من هم ؟؟

شعراء المحلف كثيرين منهم علي بن جوده وداهم بن سرهيد وحياة ابوي باني بن مساعد وعبدالله الحميدي واخوه علي وحمود الرديني وعلي بن زايد وعبدالله بن عقيل وعبدالله بن جنيدل

4-لك مشاركات في كثير من المناسبات .. آخر مناسبة وآخر قصيدة ؟

آخر مناسبة شاركة فيها فالعيد

ابدى بذكر مثبت الكون تثبيت = الواحد المعبود مرسي جباله
سامع دبيب الذر لو فوق حليت = فردن صمد معبود جلا جلاله
شاعر وامثل لابتي وين ماجيت = كسابت الناموس في كل طاله
برويضة المحمل رجالن عناتيت = سهول على كل المراجل شكاله
اهل الصخا واهل الوفا كل ماريت = فيهم كرم حاتم وفيهم جزاله
اللي لهم بالطيب شيمة وتساميت = لا جاهم المطهود يرفا خماله
بسم الرفاقة وابن مظهور هليت = عيد وفرح والطيب يفظي جماله
عموم من جانا على الطيب توقيت = اهلا هلابه عد كتب الرسالة
يامرحبا به عد من حج بالبيت = واعداد ماينشي ويظفي خياله
يامرحبا باللي على الطيب فزيت = مديت يمنا الكف ماهي شماله
بمحافظ المحمل على الطيب وفيت = فيحان بن لبده كريمة سباله
على الوفا والطيب والجود لبيت = تنوب عن سلمان في كل حاله
حكامنا ال سعود بالعز والصيت = اخوان نورة بالوفا والعداله
الله ينصرهم على كل عفريت = اهل الردا والبوق شربك حباله
ويرفع لواء الأسلام في كل مبديت = شرذمتن صارت علينا وباله
منهاجهم لدين والعلم تشتيت = ساروا على نهج الوبا والظلاله
ضعوف البصاير للمواقف شفاليت = يسعون للتفجير جبن وسفاله
هذا الجواب اللي نظمته وسويت = من جاش لهل الطيب يفظي كماله
يالمخلفي يومك على الطيب عديت = حاش الوفا والطيب والشكر ناله
ريس بلدية على جهدك اصغيت = اقولها عن لابتي بالأصاله
والخاتمة صلوا على كل ماطريت = نبيننا المرسول ينفا الجهالة

5-احب انواع القصيد واقصد بذلك الأغراض للشاعر مخلد بن باني ؟

الغزل وتالي المناسبات والذود عن القبيلة


6-البحور والطروق الشعرية هل تحب التغيير فيها ؟

والله اكتب على أي طريق يطري على بالي واذكر فيه طرق سمعته فالتلفزيون لشاعر من الأمارات يقول

تيفان بن ظاهر وعصرٍ ماضي = عيبٍ على بيت يقال هزيل
وحنا ترد امثالنا لأمثالهم = مسايل تتبع مغاني سيل

فقلت

امثال نبيها على غايت المنا = طاروق لشعار بالحل والحيل
نصوغ معناها على كل مبدأ = مثل الذهب لا صيغ بالمد والكيل
يبادع الأمثال لله درك = هاضي الغرام الوافي الطيب والقيل
الحر مياقعه على كل مرقب = عاف الوطى مافيه للحر مقيل
نتبع سلف ماضي وناخذ ونعطي = بالطيب والهمات والراي بديل
ونشوم للعليا على كل هامه = بالطيب والمعروف والعلم الجزيل
خير الفتى يعيش حرٍ معرب = رجلٍ على الشيمات مسراه هذيل
وخير الفتى يعيش بالجود والثنا = حلحيل بالهمات والراي دليل
ولا خير فالهسات في كل معنا = ولا خير في رجلن يعيش ذليل
ترى الوفا والطيب وهبه من الله = المرجله ضلعن مداه طويل
وخير الفتى يعيش بالجود وافي = وافي على الشيمات في كل حصيل
مفراص ماص الوقت لو كان قاسي = يسري مسار الليل من دون قنديل
يعيش بالدنيا كما عاش غيره = عميل فالهمات يلقاه عميل
عليك تقوى الله في كل حزه = صل الفروض الواجبه دون تهويل
إلاهنا المعبود سبحان ملكه = منجي نبي الله من واهج الميل
صلوا على المختار شفيع خلقه = إعداد مايهمل مزون هميل

7-فكرة الديوان لم تطري على بالك يابو باني .. سواء صوتي ام كتابي ..؟؟

ان شاء الله بصدر ديوان كتابي


8-من اللي ترتاح في مساجلاتهم ومجاراتهم الشعرية ؟؟
كثيرين ومنهم على سبيل المثال خزيم بن محسن الغزواني .. وشايع بن فراج السهلي ومحمد الغزواني وعقاب بن مصقال ... عبدالله بن هويدي المحلفي .. سعد بن صالح بن شايع ومحمد بن فالح المحانية

واذكر مساجلة بيني وبين الشاعر خزيم الغزواني .. ارسلت له اقول

قم يانديبي دوك والخط مكتوب= منصاك راع الطيب والمقدرية
من فوق من يطوي جراهيد بسلوب= آخر موديل ونخبته عالمية
وارد امريكا وصانعه لابس الكوب= جاهز مجهز من وكالة ولية
منصاك راع الطيب بالطيب مجذوب= من لابتن تارد حياض المنيه
في مجلسٍ مفتوح والكيف مصبوب=والعود الأزرق دار والنار حيه
خزيم وسيع العرف شاعر ومحبوب = يفتل وينقض والمعاني وفيه
يوم أنت حرٍ للمواجيب منتوب=انخاك بعلا الصوت في كل شيه
القلب كنه بين الأضلاع منهوب = قلبي غدا من سبت العوسجية
من جادلن بالحب مافيه عذروب= اقفا وانا قفيت ويلد فيه
عين اشقرٍ توه على الوكر مقضوب= وابو جديلٍ ليتن فوق ليّه
هذا جوابي جاك والعلم محسوب=تكفى يابو محسن عيوني شقيه

رد علي الشاعر خزيم الغزواني وقال

اهلآ بخط اللي شكا حب رعبوب = مخلد راع الطالات زبن الونيه
يامرحبا به عد ماجيب مجلوب= بضايعٍ تنباع بالقيصيرية
او عد ماهلت هماليل ونصوب= بدبرت ولي الكون رب البريه
ياراكب اللي وارده تو مجيوب= وارد مريكا مجوزن باتريه
جمسٍ جديد لي على الكيف مطلوب= ماوقفوا قدامه السمسرية
شاريه كاش بشيك للبنك مسحوب = ماجا من الحكام ليه هديه
توايره تفتر مع فرت الهوب= لاغيره بالثالث دريويله
روحت انا المخلد على الجمس مندوب= يعطيه خطي مع سلام وتحيه
بنسعف اللي من هوى البيض مصيوب= اللي شكا فرقا وليفه عليه
لك مستعدٍ يبو باني ومنيوب= وردب الخطر عليه رجلي جريه
الصاحب اللي لجل فرقاه مسلوب= بتجيه لون الرقابة قوية

ضيفنا الشاعر القدير / مخلد بن باني


9-المسابقات الشعرية .. وش انطباعك عنها ؟؟

فيه شي خدم الشعر وفيها اللي ماخدم ... نؤيد اللي يجي فيها كبار السن اما الحداثة لا نؤيدة


101-شعر المحاورة .. هل تهواه وتلعبه ؟؟

لا والله مالي هوايه فيه .. ولكني قد لعبته مجالسي


11-من يعجبك فالمحاورة ..؟؟

فيه شعراء كبار وهم كثيرين .. امثال مستور العصيمي وغنيم الخبيش السهلي وخلف بن هذال

يعجبني فتلهم ونقضهم لبيوت الشاعر المقابل .


12-ودنا تحدثنا عن احد فرسان المحلف وبعض قصائدة .؟؟

والله فرسان المحلف كثيرين ولهم قصائد وافعال .. ولكني بذكر لكم الفارس والشاعر حصين بن مساعد بن مويزر المحلفي السهلي الملقب براعي قشاء .. وقشعاء هي بندقه .. وعندما كبر سنه قال فيها

ياشارين قشعاء تراني ترديت = ازريت من طرد المها بالخرايم
ياما بها في مقدم الجيش طبيت = يوم الردي تطري عليه الهزايم
وياما بها من صافي الملح دقيت = درجن يخلي العظم ماله ملايم
وياما بها في عالي الرجم عديت = في مرقبن مدهال حجل القوايم

وايضآ له .. وهو كبير فالسن

الناس من الحاضر وأنا زل حاضري = الحيل واني والظروس هديم
عز الله مانيب غم ابن عمي = ولا نيب حضاي البتوع وهيم
ستر العذارا لا رمن بقناعهن = لا جاء حذف الرصاص وشيم

13-طيب حدثنا عن حروب المحلف ومعاركهم مع الروم ؟

وقعات الروم مع المحلف ثلاث وقعات وسأذكرها جميعآ

اول شي وقعة العويند

بعد سقوط الدرعية على يد قوات الدولة العثمانية وقوة محمد علي باشا والي مصر , بدت القوات تتبع الموالين لدولة السعودية وكان من ابرزهم قبيلة السهول
وحيث أن الدولة العثمانية وضعت كل قسم في ديرة يقال لهم ( الترك ) والروم بالأصح وقد هاجمت القوات العثمانية هجوم مفاجئ قبيلة السهول علىة العويند شمال غرب الرياض على بعد 110 كلم وكان قائد الحملة التركية يسمى المصطفى.

وجرت المعركة وكان النصر حليف قبيلة السهول وقتل ذلك اليوم قايدهم المصطفى وعدد كبير من افراد القوات العثمانية وكان ممن حضر تلك الوقعة المحلف من قبيلة السهول وبعض الزقاعين من السهول .. وممن برزت شجاعته ذلك اليوم الفارس مقحم بن حنيف وقد اثناء عليه الشاعر ناصر بن محمد بن مويزر الذي وصف المعركة وعدد الروم وكثرة قتلاهم قال:

يانعم يابن حنيف فاليوم القحوم= مروي بحد السيف فالعسكر قناه
ترفع له البيضا على روس الرجوم= واذناب خرفانٍ نقلط في عشاه
العنقري جانا بحضرانٍ وروم = والمصطفى يوم ربي ماهداه
هو يحسبنا من قراريش الوشوم= هو يحسبنا ثرمدا ولآ مراه
وأنا نطحناهم ونطلنا الهدوم = والكل منا عمره الغالي نساه
المصطفى جونا يطمون الحزوم= ثربه يدير الحول ما كمل نداه
ياذيب عن جال العويند لا تشوم = ومن اشبعك ياذيب ماتحلق جزاه

ابن حنيف المذكور فالقصيدة هو الفارس مقحم بن حنيف من المظهور من المحلف وله مقولة مشهور في تلك المعركة عندما صاح الصياح يامقحم روم روم اعتزى خيال الحجبا مقحم كانهم روم فأنا روميهم وامتطا ظهر فرس اخيه عبدالله الذي كان غايب عن البل ومقحم موجود في بيت عبدالله

يقول الشيخ سعود بن سعد المظهور أن لما انتهى الطراد فرس مقحم ماعرفوها لأن لونها حمراء وصار لونها اسود من البارود

المعركة الثانية معركة مجزل

هاجمت القوات العثمانية بقيادة موسى كاشف فريق من المحلف في منطقة سدير في مجزل ( مجزل عبارة عن سلسلة جبال تقع شمال الرياض 130 كيلو )
وهجمت تلك القوات فريق المحلف وكان النصر للمحلف وقد قتل قايد الحملة موسى كاشف وقاتلة هو الفارس ناصر بن محمد بن عبدالله المويزر
برواية سالم بن مشعان بن عبدالله بن مويزر السهلي ... اما المعركة هذي ذكرها ابن بشر في كتابة عنوان المجد في تاريخ نجد

المعركة الثالثة صبحاء

وكان النصر حليف للمحلف من السهول وكان مهاجمة القوات العثمانية لقبيلة السهول بسبب ولائهم لدولة السعودية وعدم تعاونهم مع القوات العثمانية ومع فارق التجهيزات والعدد كانت الغلبه للمحلف

وهذي المعركة لم يذكرها من المؤرخين ولكن ذكرها الرواة من قبيلة السهول

الشيخ سعود بن سعد بن مظهور
الشيخ ناصر بن عبدالله الحميدي
والشيخ دجين بن علي الشاعر
والراوي سعد بن محسن بن عتيق
والراوي سالم بن مشعان المويزر نقلآ عن الشيخ علي بن صقية التميمي من اهل صفرات رحمه الله

ومما قال الشعراء في هذي الوقعات من القصائد

قال الشاعر / عبيد بن زليغيف المحانية السهلي

الآد مرصوع ذباحة الروم = اهل العوايد يوم الأرياق يباس

وقال الشاعر سيف بن حنتوش المحلف يفتخر في جماعته

حنا ذبحنا الروم وادوال الحضر = ياكود من هو بذنبي بمفايله
ياربعي الرصعان بالملح والقهر = اعبوه للي مايدور عايفه

وقلت أنا ( مخلد بن باني ) يفخر بجماعته

حنا هل الطولات ذباحة القوم = تشهد لنا سبع البيارق وكادي
ثلاث وقعاتٍ على الروم بخصوم = ماهوب هرج مجمعين الدوادي
حنا هل الشدات ذباحة الروم = ناطا على الموت الحمر بالجيادي

ومما قال الشاعر شايع بن فراج يفتخر بجماعته ويصف الوقعات

ربعي سهولٍ يرفع الراس فعلهم = لا شبت الهيجا ودقت طبولها
منا المحلف والمحلف سنايدي = يايول قومي لابتي نوخولها
اهل المحاجي اليا من ندبتهم = كم سابقٍ من ضربهم جودولها
يوم العويند ومجزل وصبحا = خلو جيوش الترك تسحب ذيولها

هذا ما احببت ايضاحة وذكره عبر موقع القبيلة مجالس السهول



14-احد الأخوان عندما علم بإجراء مقابلة معك , طلب مني اسئلك عن قصة طريفة حصلت للشاعر سعد بن جفيران السهلي ..؟؟

الشاعر سعد بن جفيران السهلي من اهالي رويضة السهول وقصته تعبر عن الحب والوفى . حيث توفيت زوجته وام عياله وكان يحبها حب لا يوصف ولما شار عليه جماعته وبنو عمه بأن يتزوج لعله يدله ويرتاح من كثرة الهموم . خطب امرأه من نفس قبيلته من السهول قد توفي عنها زوجها ايضآ وهي كذلك تحبه ..

وفي ليلة الزواج لما دخل على زوجته وهو مهموم ولا يهدأ له بال ومن كثرة الهواجيس على زوجته المتوفيه تنهد وقال :

ياونتي ونة ثلاثن مسيمات = لا يقطعن خد ولا يمرحني
وغروبهن تاخذ من الجم زفات = ومحالهن جداد مايرمسني
يامن يبوّيلي على فايتن فات = والخلج لا بوّيلهن يدلهني

وكانت امرأته تسمع القصيدة فقالت : يكفي لا تكمل

ياشوق لا تكثر علي التنهات = اقصر جوابك تالي الليل عني
ان كان تبكي لك على فايتن فات = فأنا جروحي مابعد نقرشني
عطني ثلاث وخل عنك التنهات = وصيور من فارق عشيرة يوني

وبعد ماردت عليه القصيدة افترقا بنفس اللحظة وطلقها . وهذا يدل على عفة النفس والحب الشريف

وقد نشرت هذي القصة والقصيدة بإسمي في جريدة الرياض من عام 1990 ميلادي يوم الثلاثاء 29 رمضان رد على احد القراء وهو محمد القاضي .


15 – نرجع لك يابو باني ونبي نسمع آخر ماكتبت ..؟؟
آخر قصيدة قلتها في اخوي العميد فريج بن باني السهلي عندما تم ترقيته إلى رتبة عميد

مبروك ياحر تعلى مقامة = علق على المتنين تيجان ونجوم
ينوض للعليا بحزم وجزامة = على الوفا والطيب والجود صاروم
حرٍ على الطولات في كل هامة = على الصخا والطيب مع كل شغموم
علق على درب المراجل علامة = من لابتن بالكون ذباحة الروم
فريج بن باني عميد مرامة = مرامة العليا على راس مزموم
ماهوب هلباجن يعلج كلامة = درب اليمين ولاقسى الوقت لاهوم
اخذ الرتب والطبيب علق وسامة = والطيب وهبة بين معطا ومحروم

16- وحنا ادارة ومشرفين واعضاء مجالس قبيلة السهول الموقع الرسمي لقبيلة السهول نتقدم له بالمباركة والله يوفقه في حياته العملية والعلمية وفي نهاية اللقاء .. كان الحديث معك ممتع يابو باني ونشكرك جزيل الشكر .. هل من كلمة تود قولها ؟


انا اللي اشكركم والله يعافيكم ويسلمكم .. والله يبيض وجيهكم على ماتقدمونه في خدمة القبيلة






صورة لبعض الدروع وشهادة الشكر التي حصل عليها ضيفنا الشاعر مخلد بن باني

*اقيم اللقاء برويضة السهول بمنزل الشاعر مخلد بن باني.
*تواجد فالقاء الأعضاء سهل العبدالله والشاعر سعد بن مظهور.
* زاد من جمالية اللقاء الأجواء والأمطار .
*استغرق اللقاء ساعة ونصف وكانت السوالف مع ابو باني رائعة مما جعلنا نطيل الجلوس .
*يتميز الشاعر مخلد الباني بأنه يحفظ جميع القصائد والأوراق مطبوعة مما سهل اللقاء وكتابته.

السلام عليكم ..


الشآعر الكبير / مخلد بن بآني

شآعر جزل ومن كبار شعراء القبيله ..

لقاء ممتع ..أسعدنآ كثيراً

آلله لآيهينـكم ..

يعطيك العآفيه أخوي حمد الخبيش

لإهِـنتَ يآبعديَ . .

مشكورين على هذا اللقاء

ولاهنتو

ابوغنيم بيض الله وجهك ووجه شاعرنا الكبير مخلد بن باني المحلفي السهلي.

لقاء شيق وجميل استمتعت في قراءته

والى الاعلى لك وللشاعر ان شاء الله



ودائما تتحفنا بكل ماهو جديد يابوغنيم



محمد المنجلي

الشاعر /مخلد باني المحلفي

شاعر كبير وشاعر من العصور القديمه عندما تقرأ له تذكر فطاحلة الشعر بالعصر الماضي

لقاء ممتع جدا

اخوي حمد شكرا على اهتمامك الاكثر من رائع

لاهنت

السلام عليكم

لقاء كبير مع شاعر قدير وكبير .. عُرف عنه تواجده في محافل القبيلة .. وشاعريته ..

بيض الله وجهك يابو غنيم .. وللاخوان اللذين رافقوك ..

شكرا لك

والله يعطيك العافية

اخوك
فهاد

سلام عليكم ورحمة الله وبركته

شكراً على لقاء مع الشاعر الكبير المعروف : مخلد باني مساعد المحلفي السهلي

لقاء شيق جداً

وانت يابو غنيم سباق دأماً للعلوم طيبه

وتبذل جهدك بالمشاق لأبراز شعرا لقبيله

موفق بإذن الله ... لك مني أجمل تحية .

وتقبلو تحياتي : محمد مخلد باني المحلفي السهلي

وسـلام خـتـام

يعطيكم العافيه على هذا اللقاء الرائع مع الشاعر مخلد بن باني

السلام عليكم


الشاعر:مخلد بن باني المحلفي السهلي



شاعر جزل ومن شعار قبيلة السهول الكبار


الله يوفق ابو باني لكل مايحب ويرضاا


اخوي حمد لقاء شيق جدا


واستمتعت بهذا القاء

الله لايهينكـ يابو غنيم


يعطيكـ العافية

السلام عليكم ورحمة الله وبركاته



نشكرك ياااخووي حمد الخبيش على الجهوووود الجبااااره لاظهاار شعار ووجهاء قبيلة السهوول


وابو باني نارنا على علم << وهو شاعر لا يخفى على ابناء السهوول وهو من المبدعين


اطال الله في عمره اعوم واعووم


ونشكركم جميعاً على جهوودكم الجبااره





اخووووووووكم : خيال الصفراء


عبدالله بن علي بن لافي المحلفي السهلي